هادي خفاجة يعلن اعتزال التمثيل في مصر: محمد سعد السبب

hady1

| كتب: علوي أبو العلا |

قال الفنان هادي خفاجة إنه قرر اعتزال التمثيل بسبب الفنان محمد سعد وبرنامج «وش السعد »، مشيرًا إلى أنه سيذهب للفنان أشرف زكي نقيب الممثلين لتسليمه كارنيه النقابة والاعتزال.
وأضاف «خفاجة» عبر صفحته بـ«فيس بوك»: «قررت أنا هادي خفاجة اعتزال التمثيل نهائياً في مصر، وده بسبب الموقف اللى أنا هاحكيه، هو موقف في قمة قلة الذوق اللى في الدنيا، جاتلى مكالمة الساعة ١٢ بالليل إن محمد سعد عايزنى في تصوير في حلقة من برنامج (وش السعد) اللى هيا كانت انهارده وانه عايز يقعد معايا طبعاً، لبست وروحت الساعه ١ بالليل كان موجود الكاست كله ونجوم الحلقة آيتن عامر ومنة عرفة وعملنا بروفة، واتفقت مع مدير الانتاج والملابس وكل حاجه وأستاذ سامح عبدالعزيز المخرج قعدت معاه واتكلمنا عن الشخصية، واتفقنا إن التصوير بعدها بيوم وخلصت كانت الساعة ٤ الفجر».

وتابع: «روحت البيت نمت وصحيت استعديت نفسياً إني رايح التصوير وحفظت السيناريو، كان المعاد الساعه ٥ المغرب لقيت اتصال وأنا في الطريق الساعه ٤ العصر من واحد من مساعدين الإخراج بيقولى استاذ هادي إحنا أجلنا الاسكتش بتاع حلقة حضرتك وهنكلمك نقولك امتى التصوير ان شاء الله، افتح Mbc Masr من شويه الاقي الاسكتش بتاعى اتصور بممثل تانى؟ طب ليه اللف والدوران.. الحمد لله تاريخي مش هيقف على حلقة، بس موضوع تقدير، أنا حبيت أحكي لأنى وسط حاجات كتير حصلتلى مكنتش مستحمل حركة زى دى».

واختتم: «بكرة بإذن الله هاكون في نقابة المهن التمثيلية وهاسلم أستاذ أشرف زكى عضوية النقابة، لانها متلزمنيش في شئ دلوقتى بس بجد كفايه تدمير في المواهب وإحباط في الناس، لأن الوسط بجد أصبح عن عصابات تتحكم فيه، وإن شاء الله هاكمل مستقبلى الفنى في دولة تانية بتقدر الإنسانية قبل المواهب والمجالات، وده قرار نهائى بجد بينى وبين نفسى مش هرجع فيه».